"Marafon"un prezidenti: "Hədəfimiz çempion olub I Liqaya yüksəlməkdi" - MÜSAHİBƏ
- 12:00
- 36
Sabirabadın “Marafon” klubunun prezidenti Vüsal Xəlilov ölkə kubokunun ilkin təsnifat mərhələsi çərçivəsində “Dinamo” üzərində qazanılan 3:0-lıq qələbədən sonra Rekord.az saytına eksklüziv müsahibə verib:
- - Öncə qələbə münasibəti ilə təbrik edirik.
Oyunla bağlı təəssüratlarınız…
- - Çox sağ olun. Rayonumuz üçün bir yenilik oldu. Uzun fasilədən sonra Sabirabad komandası peşəkar liqada təmsil olundu, ölkə kubokunda mübarizə apardı. Azarkeşlər üçün də maraqlı oyun oldu, rayonumuz üçün də maraqlı ab-hava yarandı.Düşünürük ki, bundan sonra azarkeşlərimiz daha
da çox olacaq. Bütün bu işlərdə, stadionun tikilməsində, komandanın fəaliyyətində
bizə dəstək olan hər kəsə minnətdaram. Siz də sağ olun ki, gəlib bizi
işıqlandırırsınız. Bizə dəstək olmaq, elə ölkə idmanına, ölkə gəncliyinə dəstək
olmaz deməkdir. Biz də çalışacayıq bundan
sonra daha yaxşı nəticələr qazanmaqla bizə olan inamı doğuruldaq.
- - “Marafon”un bir klub olaraq hədəfi nədir?
- - Bu il çempion olmaq və I Liqaya yüksəlmək. Azərbaycan
kubokunda da kifayət qədər güclü komandalar var, bundan sonra I Liqa komandası
ilə qarşılaşacayıq. Allah qoysa qalib olsaq, Premyer Liqa komandası ilə
oynayacayıq. Hədəflər çoxdur, inşAllah nail olamağa çalışacağıq. Nə qədər nail
olacayıq, bunu zaman göstərəcək, gördüyümüz işlər göstərəcək.
- - Stadionla bağlı soruşmaq istərdim. Niyə
Bulaqlı kəndi seçildi?
- - Rayonda bir neçə yeri baxışdan keçirmişdik.
Buranın şəraiti bizi məcbur elədi ki, tikinti işlərinə burda başlayaq. Burada şərait
daha münbitdi. Kəndin camaatı da futbolu sevir, rayon mərkəzinə də yaxındı, əhali
də burda çoxdur və bu gün də o kütləni burda görə bildim. Düşünürəm ki, növbəti
oyunlarda azarkeş sayı daha çox olacaq.
- - Sabirabadın mərkəzi stadionunda, olimpiya
stadionunda bu işləri görməyə nə mane oldu?
- - Rayon stadionu başqa qurumun tabeliyindədir. Onlarla razılıq əldə edə bilmədik. Bununla
belə, danışıqlar gedir və ümid edirəm ki, gələcəkdə razılıq əldə edə biləcəyik. Amma bugünkü günə hələ ki, yenilik yoxdur.
- - Maliyyə məsələsidir?
- - Xeyr, maliyyə deyil. Ümumiyyətlə, klubla bağlı
məsələ deyil. Stadionun tabe olduğu qurum məsələni AFFA ilə həll etməli idi.
Amma hansısa səbəbdən məsələ uzandı. Odur ki, bizdə gözləmə mövqeyindəyik. Yəqin
ki, gələcəkdə məsələ hansısa formada həll olunacaq.
- - Siz həm də Mərkəz Regional Futbol
Federasiyasının prezidentisiniz. Qurum olaraq hansı planlarınız var?
- - Tək Sabirabadda yox, federasiyaya tabe olan 11 rayonda və o rayonların kəndlərində futbol oynamağa yararlı stadionların yaradılmasına çalışırıq. Ən azı ot örtüyü futbol oynamağa imkan versin. Büdcə imkan verərsə, tribuna və s. məsələlər üzərində də işlər görmək olar. Amma bu, tək regional federasiya, AFFA-nın üzərində olan məsələ deyil, həmin rayonların özləri də bu işlərdə maraqlı olmalıdır. Rayonların imkanlı şəxsləri, sponsorlar bu işə cəlb olunsa, daha yaxşı olar. Onlar da əlini daşın altına qoymalıdır. İnanıram ki, futbolda uğurlu nəticələr həmin şəxsləri də futbola cəlb edəcək. Çünki olimpiya idman növlərində yaxşı nəticələrimiz var, dövlət səviyyəsində idmana dəstək var, cənab Prezidentin tapşırığıdır və biz də çalışırıq onun bu tapşırıqlarına əməl edək.
Kənan MƏSTƏLİYEV, Sabirabad
