"Sabah"ın baş məşqçisi Valdas Dambrauskas Bakıda Bolqarıstanın "Levski" (Sofiya) komandasına qarşı keçirdikləri UEFA Konfrans Liqasının 3-cü təsnifat mərhələsinin cavab oyununu şərh edib.

Rekord.az xəbər verir ki, o, 0:2 hesabıyla uduzduqları matçla bağlı mətbuat konfransında fikirlərini bölüşüb:

"Danışmağa çox sözüm yoxdur. Əgər iki oyunda fərqlənə bilmiriksə, demək rəqib komanda növbəti mərhələyə yüksəlməyə layiqdir. Səfərdə nizam-intizamlı oyun sərgiləmişdik. İlk matçda bizi heç-heçədən son 10 saniyə ayırdı. Cavab matçında rəqib riskə getmədi, biz isə etməli idik. İlk yarıda 1 səhvə yol verdik, o da qolla nəticələndi. Bu gün meydana toplaşan azarkeşlərə öz təşəkkürümüzü bildiririk.

Artıq bu qarşılaşmanı unudub, Premyer Liqaya köklənəcəyik. Bizim bir arzumuz var ki, 2025/2026 mövsümünün sonunda turnir cədvəlində avrokuboklar zonasına düşək. Azərbaycanı Avropada daha yaxşı təmsil etmək istəyirik".

“Sabah" - "Levski" görüşü qonaqların 2:0 hesablı qələbəsi ilə bitib. Azərbaycan təmsilçisi səfərdəki ilk oyunda da 0:1 hesabıyla uduzduğu üçün avrokuboklarla vidalaşıb.