Azərbaycan Futbol Federasiyaları Assosiasiyasının (AFFA) təqdim etdiyi və yerli futbolsevərlər arasında böyük maraq doğuran APL Fantasy platformasında artıq 14 000-dən çox istifadəçi qeydiyyatdan keçib.

Rekord.az xəbər verir ki, Azərbaycan Premyer Liqasının 2026/27 mövsümünün başlaması ilə APL Fantasy-də mövsümün ilk turunun qalibi də müəyyənləşib.

İlk turun qalibi 25 yaşlı Ramiq Qasımov olub. O, 33 turluq mövsümün ilk turunda 79 xal toplayaraq 14 000-dən çox iştirakçının yer aldığı ən böyük liqa — APL Fantasy Liqasında birinci pilləni tutub.

İlk turun qalibi Ramiq Qasımov əldə etdiyi nəticəyə görə AFFA və APL Fantasy-nin tərəfdaşı “Euroacs” şirkəti tərəfindən mükafatlandırılıb.

APL Fantasy iştirakçılarına Azərbaycan Premyer Liqasının real futbolçularından virtual komanda formalaşdırmaq, hər turun nəticələrinə uyğun xal toplamaq və digər futbolsevərlərlə rəqabət aparmaq imkanı yaradır. Mövsüm ərzində keçiriləcək 33 turun hər birinin yekununda qaliblər müəyyənləşdirilərək mükafatlandırılacaq.

Platformaya marağın daha bir göstəricisi isə APL Fantasy-də artıq 300-dən çox liqanın yaradılmasıdır. Bu liqalar futbol klubları, media qurumları, müxtəlif brendlər və digər təşkilatlar tərəfindən yaradılıb. Onların bir çoxu bütün istifadəçilər üçün açıqdır və reytinqin liderlərini müxtəlif mükafatlar gözləyir.

APL Fantasy yalnız fərdi rəqabət deyil, həm də futbol klubları, media və brendlər üçün öz auditoriyalarını bir araya gətirə biləcəkləri yeni rəqəmsal platforma rolunu oynayır. İstifadəçilər müxtəlif liqalara qoşularaq dostları, həmkarları, digər futbolsevərlər və müxtəlif təşkilatların yaratdığı komandalarla rəqabət apara bilirlər.

Mövsümün sonunda isə APL Fantasy iştirakçılarını daha böyük mükafatlar gözləyir. Ən çox iştirakçının yer aldığı APL Fantasy Liqasında mövsümün yekun nəticələrinə əsasən onlarla müxtəlif mükafat təqdim olunacaq. Əsas mükafat isə qaliblərdən biri üçün xüsusi futbol təcrübəsi olacaq — Azərbaycan milli futbol komandası ilə birlikdə komandanın rəsmi səfər oyunlarından birinə iki nəfərlik səfər.

AFFA bütün futbolsevərləri APL Fantasy-yə qoşulmağa, öz virtual komandalarını qurmağa və 33 tur ərzində mübarizəyə davam etməyə dəvət edir.

Oyuna qoşulmaq və daha ətraflı məlumat əldə etmək üçün: