Xəbər verdiyimiz kimi, yenidən Premyer Liqaya qaytarılan "Kəpəz" ayın sonunda hazırlıqlara start verir. 

Rekord.az xəbər verir ki, böyük ehtimalla komandanın baş məşqçisi Yaşar Vahabzadə olacaq.

Düzdür, hələlik, məşqçi ilə komanda arasında rəsmi müqavilə bağlanmayıb. Lakin saytımıza açıqlama verən Vahabzadə bunun yaxın zamanlarda mümkünlüyünə işarə vurub: "Müqaviləm bu yaxınlarda rəsmən başa çatır. Bu müddət rəsmən bitəndən sonra yəqin ki, yeni müqavilə ilə bağlı da danışığımız olacaq".

Vahabzadə yeni transferlərlərlə bağlı son durum haqda da məlumat verib: "Təbii ki, aktiv danışıq apardığımız futbolçular var. Hətta anlaşmağa çox yaxınıq. Sadəcə, nöqtənin qoyulmasını gözləyirik ki, ictimaiyyətə açıqlayaq. Hazırda əsas diqqəti yerli futbolçulara yönəltmişik. Yerlilərlə məsələ bitəndən sonra legioner məsələsinə də baxmaq olar. Eyni zamanda I Divizionda oynamış heyətdən gənc futbolçuları da komandada saxlamağı düşünürük".