"Şamaxı" sözün əsl mənasında böhranla üz-üzədir. Hətta komanda fəaliyyətini dayandırdığını açıqlasa belə, təəccüblənmərik. Daha öncə klubun büdcəsinin 3 milyona qədər azaldılması haqda məlumat vermişdik. Bunun özü ciddi sıxıntıların olacağının siqnalı idi. Çünki sabiq "Keşlə" ötən il qazanılan kubokun 200 minlik mükafatını hələ də futbolçulara verməyib. Üstəlik, mart ayından bəri komanda üzvləri maaş üzü də görmür.

Rekord.az xəbər verir ki Zaur Axundovun gedişi onsuz da çətin olan işləri daha da çətinləşdirib.

Elxan Məmmədovun dostu olan və onun sayəsində "Keşlə"nin başına keçən Axundov sabiq icraçı vitse-prezidentin AFFA-dan ayrılaraq Parisə getməsindən sonra əvvəlki səlahiyyətlərə sahib olmayacağını gözəl anlayırdı. Məhz buna görə postunda çox qalmadı və ötən gün "Şamaxı"nın Mühahidə Şurasının sədri postundan getməyə qərar verdi. Axundovun gedişi niyə komanda üçün əlavə zərbə oldu? Çünki həm də iş adamı olan sözügedən şəxs "Şamaxı"ya həm də şəxsi maliyyəsindən vəsait ayırırdı. Buna görə onun "Şamaxı"da olması AFFA üçün də sərfəli idi. Lakin Axundovun gedişi ilə bu maliyyə də kəsiləcək və bütün yük tamamilə federasiyanın boynunda qalacaq. Bütün bunların fonunda bölgəni təmsil edən komandanın daha da sıxıntılı günlərə qədəm qoyacağı şübhə doğurmur. Son zamanlar aparıcı futbolçuların bir-bir komandanı tərk etməsi də bunun sübutu sayıla bilər.