“Neftçi”də yeni mövsümlə bağlı planlar yubanır. İyunun 2-də klubun Müşahidə Şurası yığışmalı, həm baş məşqçi postu, həm də büdcəylə əlaqədar qərarlar verməli idi. Amma sonda şuranın bir araya gəlməsi mümkün olmadı. Dünən isə klub rəsmən iclasın iyunun 8-də baş tutacağını açıqladı.

Rekord.az xəbər verir ki, yubanmanın səbəbi heç də Müşahidə Şurasının üzvlərini bir yerə toplamağın mümkünsüzlüyü deyil.

Sadəcə, sponsorlar büdcəylə bağlı qərar verə bilmir, bu səbəbdən proses yubanır. Büdcə bəlli olmalıdı ki, komandanın hansı baş məşqçiylə yola davam edəcəyi dəqiqləşsin. Maliyyə sıxıntısı olarsa, Samir Abasov postunda qalacaq, əks halda, əcnəbi məşqçi gətiriləcək.

“Neftçi”nin yeni baş məşqçisi olacağı gözlənilən Viktor Qonçarenko bu həftə Bakıda olub. Klub bunu gizli saxlamağa çalışsa da, belaruslu mütəxəssisin klub bazasında, “Bakcell Arena”da olduğu dəqiqdi. O, paytaxt təmsilçisinin infrastrukturu ilə tanış olub, lakin maliyyə məsələlərinə görə Bakıdan incik ayrılıb.

Belə ki, Qonçarenkonun illik 250 min dollar maaş tələbi məqbul bilinib, sadəcə, onun digər şərtləri problem yaradır. Köməkçilərindən həkimə kimi 9 nəfərlik heyətlə “Neftçi”yə gəlmək istəyən çalışdırıcı, onlar üçün də normal şərait yaradılmasını istəyib. Bakılılar hazırda komandada olan yerli kadrların qalmasını, Qonçarenkonun gətirəcəyi mütəxəssislərdən bəzilərindən imtina etməsini istəyib. Məşqçi bu tələblərlə razılaşmayıb, işə vahid işçi komandasıyla başlaya biləcəyini söyləyib.

Qonçarenkonu ən çox narazı salan klubun büdcəsinin hələ də dəqiqləşməməsidi. O, Konfrans Liqasında uğurlu çıxış tələb edən rəhbərliyin hələ də bir çox məsələləri yoluna qoymamasından narahatdı. Heyətlə bağlı məsələlər, gedəcək və qalacaq futbolçuların müəyyənləşməməsi məhz maliyyə vəsaitinin həcminin dəqiqləşməsindən sonra mümkünləşək. Qonçarenkonu isə bu durum qane etmir və o, Bakını tərk etməyi lazım bilib. İyunun 8-dəki iclasdan sonra vəziyyətdən asılı olaraq onunla yenidən əlaqə saxlana bilər.

BATE, “Kuban”, ÇSKA, “Krasnodar” kimi klubları çalışdırmış 44 yaşlı mütəxəssis yaxşı karyeraya malikdi. Onun Roberto Bordinlə müqayisədə daha az maaşa “Neftçi”yə gəlmək istəməsi, konkret hədəflər müəyyənləşdirməsi qeyd olunmalıdı. Bakıda uğurlu olub-olmayacağı dəqiq deyil, lakin ümid bəslənəsi mütəxəssisdi. O başqa məsələ ki, “Neftçi” hazırda onun istəklərini reallaşdıra bilmir. Xüsusilə büdcəylə bağlı məsələlərdə qərarların gecikməsi yaxşı hal deyil. (futbolinfo.az)