Xəbər verdiyimiz kimi, Qəbələdə təlim-məşq toplanışında olan U-19-un heyətində dəyişiklik olub.

Rekord.az xəbər verir ki, üç futbolçu - Xəyal Fərzullayev (Sumqayıt), Qurban Səfərov (Şamaxı) və Elcan Əbilov (Neftçi) nizam-intizam qaydalarını pozduğuna görə baş məşqçinin qərarı ilə heyətdən kənarlaşdırılıb.

Görəsən, oyunçular hansı hərəkətinə görə Miloş Velebitin qəzəbinə tuş gəlib? Etibarlı mənbədən "Futbol plus"a daxil olan məlumata görə, futbolçular millinin düşərgəsinə gec qoşulublar. Daha doğrusu, şəhərə gəzməyə çıxan “üçlük” nəzərdə tutulan vaxtdan 30 dəqiqə sonra komandanın qaldığı otelə gəlib. Bu isə Velebitin haqlı narazılığına səbəb olub və mütəxəssis futbolçuları heyətdən kənarlaşdırıb. Onu da qeyd edək ki, qapıçı Xəyal Fərzullayevin əvəzinə komandaya "Qəbələ"nin üzvü Məmməd Muradov cəlb olunub.

U-19 bu gün və iyunun 10-da Qazaxıstanın müvafiq yaş qrupundan ibarət komandasına qarşı iki yoldaşlıq oyunu keçirəcək.