“Rayo Valyekano”nun idman direktoru David Kobenyo hücumçu Radamel Falkaonun gələn mövsüm də komandada oynayacağını açıqlayıb.

Rekord.az xəbər verir ki, klub rəsmisi, bir neçə günə Falkao ilə yeni müqavilə bağlanacağını deyib:

“O, gələn mövsüm komandamızda oynamağa davam edəcək. Bir neçə gündən sonra rəsmi açıqlama olacaq.

Falkaonun anlaşmasında müqavilənin daha bir il uzadılması variantı var idi və biz bundan yararlandıq”.

Falkao 2021-ci ildə “Rayo Valyekano”ya keçib. 36 yaşlı kolumbiyalı ötən mövsüm La Liqada 22 matçda forma geyinib və 6 qol vurub.

Falkao əvvəllər “River Pleyt”, “Portu”, “Atletiko”, “Monako”, “Mançester Yunayted”, “Çelsi” və “Qalatasaray”da çıxış edib.