"Qarabağ" ÇL-ə birbaşa qruplardan (liqa mərhələsi) başlaya bilər.

Düzdür, hələ çox tezdir bu barədə danışmaq, amma ən kiçik ehtimalı da müzakirə etməliyik.

Bilirsiniz ki, "Qarabağ" hazırda ÇL-də çıxış edir və əsas mərhələyə təsnifatdan gəlib. Ölkənin reytinqi imkan verməsə də, klubun öz reytinqi yüksək olduğundan "köhlən atlar" iki mövsümdür yarışa 2-ci mərhələdən başlayırlar. Komanda təsnifatın "Çempionlar yolu" ilə irəliləyir. Bu "yol"un özəlliyi ondan ibarətdir ki, burada ancaq ölkələrinin çempionları iştirak edirlər. Yüksək reytinqi olan ölkələrin medalçıları isə ayrı - "Liqa yolu" ilə yarışırlar. 

Bizə maraqlı olan birinci yoldur. Əsasnaməyə görə, bu yolda çıxış etməli olan klublar arasında ən yüksək reytinqə malik olanı təsnifat mərhələsindən birbaşa qrupa (liqa) çıxır. Həmin klublar isə UEFA-nın ölkələr reytinqində ilk 10-luqdan kənarda olanlar arasından seçilir. 11-ci pillədə Şotlandiyadır. Yəni bizim klubumuz bu ölkənin çempionundan daha çox xala malik olmalıdır.

Real görünmür.

Hazırda "Qarabağ"ın aktivində 40.000 xal var və komanda 56-cı pillədə qərarlaşıb. Şotlandların hazırkı təmsilçiləri arasında ən reytinqlisi isə "Qlazqo Reyncers"dir, 34-cü pillədədirlər, 57.250 xalları var. Aradan qaldırılması mümkünsüzə yaxın fərqdir. 

Amma bu komanda ölkə çempionu olmasa, avtomatik rəqiblərimiz sırasından çıxır. Maraqlıdır ki, hazırda liqalarında "Harts" liderdir və bir oyun az keçirən "reyncerlər"i 9 xal qabaqlayırlar. Hər şey ola bilər.

Məsələn, aradakı komandalardan biri də "Bodo Qlimt" idi. Avropaya səs salan şimallılar bir saat əvvəl bitən matçla ölkə çempionluğunu əldən verdilər. Gələn mövsüm Norveçi ÇL-də "Vikinq" təmsil edəcək. Onun reytinqi isə "Qarabağ"dan çox aşağıdır.

Digər qiyabi rəqiblərimiz hazırda "Olimpiakos", "Kopenhagen", "Dinamo", "Zalsburq", PAOK, "Şaxtyor" və "Ferensvaroş"dur. Həm güclüdürlər, həm də işi çətinləşdirən başqa bir məqam da var. Bu komandalar da avrokuboklarda çıxışlarını davam etdirirlər. "Qarabağ" reytinqini artırmaq üçün Çempionlar Liqasında mübarizə aparır, digərləri Avropa və hətta Konfrans Liqasında. Orada xal yığmaq isə təbii ki, daha asandır. 

Bir sözlə, şans var, amma çox azdır. 2026-27-ci illər mövsümündə bu möhtəşəm hadisənin baş verməsi ehtimalı aşağıdır. Ancaq "Qarabağ" bu il də Azərbaycan çempionu olub yenə builki kimi ÇL-in əsas mərhələsinə gəlib möhtəşəm çıxış etsə, 2027-28-ci illər mövsümündə xəyallar gerçəkləşə bilər.

Gör, "Qarabağ" bizi nələrin mümkünlüyü haqda danışmağa məcbur edir. Azərbaycan klubu, birbaşa ÇL-in əsas mərhələsində...