“Kəpəz”in növbəti transfer planı baş tutmayıb.

Rekord.az xəbər verir ki, söhbət xeyli müddət komandanın məşqlərində iştirak etmiş braziliyalı futbolçudan gedir.

Juninyo Maranhense bu ayın 13-də “Kəpəz”in Bakıdakı məşqlərinə qoşulmuşdu.

Gəncəlilərin məşqlərində və yoldaşlıq görüşlərində iştirak edən vinger baş məşqçi Yaşar Vahabzadənin diqqətini çəkməyi bacarmışdı. Vahabzadə klub rəhbərliyi ilə söhbətdə Juninyo ilə müqavilə bağlanılmasını qətiyyətlə bildirmişdi. Lakin...

Futbolçunun Litva “Babrungas”ı ilə müqaviləsi olduğundan, məsələ iki klub arasındakı danışıqların müsbət nəticəsi ilə başa çatmalıydı.

Di gəl, Litva təmsilçisini razı salmaq mümkün olmayıb. Tərəflər maliyyə şərtərində razılığa gələ bilməyincə, Juninyo Azərbaycanı tərk edərək Avropaya yollanıb.

“Kəpəz” mövsümlərarası fasilə dönəmində heyətini hələ ki, 3 legionerlə gücləndirib. Bunlar Giorgi Kantariya, Mate Kvirkviya, həmçinin Abdullahi Şuaybudur. (sportinfo.az)