Azərbaycan Premyer Liqasında 2022/2023 mövsümü avqustun 5-də start götürəcək. Bu isə əvvəlki mövsümlə müqayisədə 10 gün erkən start deməkdir. Əslində, dünyanın əksər liqaları tez başlayacaq. Səbəb Qətərdə keçiriləcək mundialla bağlıdır. 21 noyabr-18 dekabr aralığında baş tutacaq DÇ-2022 yerli çempionatların qrafikinə təsirsiz ötüşməyəcək. 

Bəs Peşəkar Futbol Liqası hansı amili nəzərə alıb: Premyer Liqa DÇ-yə görə, yoxsa komanda sayının 8-dən 10-a artırılması ilə bağlı irəli çəkilib?

Rekord.az xəbər verir ki, fanat.az-a açıqlama verən qurumun Texniki İdman Departamentinin rəhbəri Elgiz Abbasov məsələyə belə aydınlıq gətirib: 

"Bir neçə gün öncə Azərbaycan Premyer Liqasının və I Divizionun startı ilə bağlı rəsmi açıqlama verildi. Bildiyiniz kimi, bu il Premyer Liqa 10 komandanın iştirakı ilə keçiriləcək, coğrafiya genişlənəcək. Biz 10 komandalı, 4 dövrəli, 36 turdan ibarət liqa keçirəcəyik. Bu isə ötən illə müqayisədə 8 tur, həftə etibarilə 8 həftə çox deməkdir. Belə olan halda, liqanın tez başlayıb, gec bitməsi və fasilələrin az olması normaldır.

Dünya çempionatı vaxtı oynayıb-oynamayacağımıza gəlincə, bununla bağlı seçim liqaların öz əlindədir. Biz mundial vaxtı liqaya davam edəcəyik və hər hansı bir fasilə planlaşdırılmır. Detallara bağlı püşkatmadan sonra daha rahat danışa bilərik".