Vaxtilə “Keşlə”nin (hazırkı "Şamaxı") baş məşqçisi olmuş Yuri Maksimovun yenidən Azərbaycanda çalışmaq imkanı olsa da, bundan imtina edib.

Rekord.az xəbər verir ki, o, bu barədə ölkəsinin mətbuatına açıqlamasında bildirib:

“Azərbaycandan təklif var idi, amma mən ora getmək istəmədim”.

Lakin o, təklifindən imtina etdiyi komandanın adını açıqlamayıb.

Ukraynanın "Vorskla" komandasının baş məşqçi postunu bir müddət öncə tərk etmiş Yuri Maksimov gələcək planları barədə danışıb:

“Baş məşqçi fəaliyyətimi davam etdirmək istəyirəm. Həyat bununla başa çatmır, davam edir. Hazırda əsas məsələ budur ki, Ukraynada müharibə başa çatsın. Sonra isə futbol barədə düşünəcəyik. Təklif olarsa, məmnuniyyətlə qəbul edərəm. İstənilən təklifə hazıram. Kim birinci təklif etsə, ora gedəcəyəm".

Təcrübəli mütəxəssis onu istefaya göndərmiş "Vorskla" rəhbərliyinə qarşı incikliyinin olmadığını söyləyib: "Mən bu mövzuda ümumiyyətlə danışmaq istəmirəm".

Xatırladaq ki, Maksimov 2017/2018 mövsümünün ikinci yarısında "Keşlə"nin baş məşqçisi olub. O, komandaya Azərbaycan kubokunu qazandırıb.