Ümumi götürsək, durum ortadadır. Hər şey bərbad və ümidsiz. Bu cür davam edəcəyini bilə-bilə davam edirlər. Hansısa oyundan, taktiki gedişdən, mübarizə əzmindən danışmağına dəyməz. Mahir Əmrəli ilə De Byazi deyir ki, iki oyuna qapıya 60 zərbə vurmuşuq. Bunlar hansı qapını deyir, mən bilmirəm, amma bizim bildiyimiz standard futbol qapısına zərbə vuran yoxdur. Slovakiya ilə oyunun statistikasına görə, 90 dəqiqə ərzində çərçivə istiqamətinə cəmi bir, ya iki zərbə vurulub. Milli oyun ərzində bir dəfə də olsun oyundankənar vəziyyətə düşməyib. Sən əgər 90 dəqiqə ərzində bir dəfə də olsun, oyundankənar vəziyyətə düşmürsənsə, bunun iki səbəbi var: ya o qədər usta futbol oynayırsan ki, rəqib müdafiəçilərin bütün ofsayd səddindən yayınırsan, ya da rəqib qapısına yaxın düşə bilmirsən. Bizim milli bunların hansını edib, buna özünüz qərar verin.

Heyər seçimi fiasko. De Byazi neçə ildir Azərbaycanda çalışır, millinin baş məşqçisidir, hələ də optimal heyət formalaşdıra bilməyib. Ölkədə futbolçu bolluğu ola, deyəsən ki, çətinlik çəkir. Vur-tut 30-35 futbolçu var da 3 ilə bunlardan heç olmasa 70 faizi stabil olan "onbirlik" qura bilmirsənsə, niyə işləyirsən? Biz görmüşük ki, klubunda daha stabil, daha çox oyun keçirənlər millidə önə çəkilir. Bizdə əksinədir, klubunda ehtiyatda qalanlar, oyun praktikası olmayanlar start heyətində yer alır, oyun praktikası olanlar oturur ehtiyatda.

Qara Qarayev öz ampluasında ölkədə ən güclüdür. Üstəlik, ölkənin ən güclü komandasının əvəzedilməz 2-3 futbolçusundan biridir. Amma De Byazinin start heyətində bu adama yer tapılmır.

Mərkəzdə Eddi İsrafilovla Riçard Almeydanı oynadan adam hansı məntiqlə qola ümid edir? Ümumiyyətlə, Almeydanın nə işi var milli komandada? 33 yaşlı bir legioner niyə hansısa yerli futbolçunun yerini tutmalıdır?

Hazırkı durumda heç nəyə yaramayan, artıq çəkisi olan Dmitri Nazarov kimin, nəyin marağı naminə gəlib ehtiyat oyunçular skamyasında oturmalı və toplanış boyu büdcədən ona pul xərclənməlidir? Hansı ki, pandemiya vaxtı min bir bəhanə ilə millidən imtina etmişdi.

Ozobiç nümunəsi də bunlara dərs olmadı? Adam açıq şəkildə AFFA-ya deyib ki, belimdə yüngülvari zədəm var, onu müalicə etdirəcəm, məni milliyə çağırmayın. Tərlan Əhmədov, Kamal Quliyev, Zaur Tağızadə daha ağır vəziyyətdə iynə altında çıxıb oynayırdılar. Biz hələ də dərk etmirik ki, bu ölkənin millisinin formasını ürəyində milli ruh olanlar geyinməlidir.

9 aydır klubunda qol vurmayan Renat Dadaşov hansı idman prinsiplərinə görə milliyə dəvət alır?

Höccət Haqverdini zorla milliyə sırıyanların məqsədi nədir?

Aleksandr Nuriyev hansı fövqəlistedada malikdir ki, 1 həftəyə sifariş olunur, 1.5 ay "Sumqayıt"da oynayır və bu gün çox rahat şəkildə milli formanı geyinib oyuna çıxır. Adam Ukraynada ortabab futbolçu idi, müharibə başlayanda futbolsuz qaldı, amma bu gün Azərbaycanın ən imkanlı klubu ilə yaxşı müqavilə bağlayıb, Azərbaycan millisində forma geyinir. Milli komandanın qapısı nə vaxta kimi karvansaray qapısı olacaq?

Mini-futbol millisinin uğuru bir daha sübut etdi ki, sistemli, düzgün iş qurularsa, sırf azərbaycanlılardan təşkil olunan heyətlə belə, uğur qazanmaq olar. AFFA-nın əli dəyən yer cəhənnəm olur, bu, artıq özünü sübut edib. Daha doğrusu, AFFA-nın yox, AFFA-nı 14 ildir zəbt edən futbol qatillərinin əli dəyən hər yer. Bəlkə də şablon olacaq, amma yeganə çıxış yolu budur: AFFA-nın hazırkı rəhbərliyi, bütün idarəetmə sistemi, icraiyyə komitəsi hamısı köklü şəkildə istefaya getməli, yeni rəhbərlik, şəffaf, futbolu sevən, onun inkişafında maraqlı olan idarəetmə sistemi qurulmalıdır. Bu ölkənin futbolunun başqa xilas yolu yoxdur.

Anar XANLAROV