Bu həftə "Neftçi"də Müşahidə Şurasının iclası baş tutdu. 3 saata yaxın davam edən müzakirələrin sonunda baş məşqçi Samir Abasovla yollar ayrılmasına və onun yerinə əcnəbi mütəxəssisin gətirilməsinə qərar verildi. Bundan başqa Futbol Akademiyasının da əcnəbi mütəxəssisə tapşırılacağı elan olundu. Görəsən, bu qərarlar gələcəkdə "Neftçi"yə nə kimi faydalar verə bilər? Ümumiyyətlə, fayda verə bilərmi?

Suallarımıza cavab tapmaq üçün üz tutduq idman mətbuatının tanınmış simalarına.

Sənan Abdullayev (Xəzər TV): "Hər kəsə bəllidir ki, "Neftçi"nin bugünkü durumunda heç də əsas günahkar Samir Abasov deyil. Amma Abasov öz gedişində əsas günahkarlardan biridir demək də yanlış olmur. Samir bəy "Neftçi"də uzun müddət qalmaq üçün xarizmasından çox şey xərclədi. Klub rəsmisinin sosial şəbəkədə baş məşqçini ələ salması artıq çox şeyə işarə idi. Digər tərəfdən bu komandada avrokuboklarda mümkün bütün şansları xərcləyirsənsə, səbəb nə olur olsun gedişi gözə almalısan. Ələsgərovun, Kanenin, Krivotsyukun rahat gedişləri və əvəzinə gətirilənlər də göstərdi ki, "Neftçi"də həndbol oynanılır, ya da top bir əldə deyil. Qərarlara gəlincə, Vernidubla Qonçarenko arasından seçim edəcəyi deyilib. Bəllidir ki, ikisindən də ilk növbədə Konfrans Liqasında uğur istənilib. İkisi də avrokuboklarda kiçik büdcə ilə fantastik nəticələr qazanmış adamlardı. Əmması budur ki, Qonçarenko bunu illər əvvəl edib. Vernidubun son uğurunda isə "Şerif"in heyətində demək olar moldovalı olmayıb. Üstəlik, Azərbaycan səviyyəsində yüksək əmək haqqı və bahalı oyunçular istəyəcəkləri də şübhəsizdir. Əminəm ki, bu məşqçilər ən azı 2 illik müqavilə tələb edəcəklər. "Neftçi" 10-cu yeri tutsa da, göndərmək böyük xərc tələb edəcək. Yəni yeganə risk edən tərəf yenə "ağ-qaralar"dır. Ən böyük risk isə bu təyinatın gecikməsidir. Yəni ilk bəhanə hazırdır. Akademiyaya əcnəbi texniki direktorun təyin edilməsi yaxşı qərardır. Bu həm də "Neftçi" rəhbərliyinin dostluq münasibətləri qurmaq üçün topladığı imkanlı şəxslərin uşaqlarından qurulmuş pullu qrupların idarəsinə də kömək edəcək. Əcnəbi həmişə hörmətli görünür axı. "Neftçi" rəhbərliyi sözdə böyük akademiyalardan qurmaq istədiyini deyir, amma gedişatdan uğursuzluq ab-havası var".

Rəşad Ergün (Komanda.az): "Düşünmürəm ki, Samir Abasovun gedişi, yeni baş məşqçinin gəlişi "Neftçi"də ciddi dəyişikliyə səbəb olsun. Ötən il Premyer Liqada çempion olan, bu il ikinci yeri tutan baş məşqçinin göndərilməsi də özlüyündə maraqlıdır. Düzdür, "Neftçi"dən bunu kubokdakı uğursuzluqla əlaqələndiriblər. Amma məncə, bəhanədir. "Neftçi" ötən il avrokuboklarda biabırçı çıxış etmişdi, rəhbərlik də başa düşürdü ki, eyni faciə onları bu il də gözləyir. Çıxış yolunu Abasovdan qurtulmaqda gördülər. Bundan sonra necə olacaq? "Neftçi" ən azı "Qarabağ"dan öyrənməlidir - səbrli olmağı, transfer işini, baş məşqçi seçimini, ona hansı səlahiyyətlər verib-verməməyi. Bunları edə bilsələr, bəlkə, Azərbaycan çempionatında həqiqi rəqabət də yaranar. Təkcə ölkədə yox, avrokuboklarda da".

Amal Abışov: "Sözsüz ki, artıq azarkeşlər də, ictimaiyyət də "Neftçi"nin avrokuboklarda necə çıxış edəcəyini maraqla gözləyir. Bu çətin sınaqda da komandanın başında əcnəbi çalışdırıcının dayanacağı dəqiqdi. Əcnəbinin gəlişi isə "Neftçi"dən gözlənilənləri artıracaq. Amma şəxsən mənə yeni məşqçinin qısa müddətdə nələri dəyişə biləcəyi qaranlıqdı. Samir Abasovun gedişi Müşahidə Şurasının iclasında qəbul olunan qərarların ən ciddisidi. Fikrimcə, Abasov özü də gedəcəyini çoxdan hiss etmişdi. Əcnəbi çalışdırıcının gəlişi həm də büdcənin artırılması deməkdi. Görünür, sponsorlar daha yaxşı nəticələr arzusundadı. Bu kimi prosesləri uzun müddətdi izləyirik. Bazanın tikintisinin yekunlaşması, akademiyanın tam gücüylə işə başlaması təkcə "Neftçi" adına yox, ümumiyyətlə, Azərbaycan futbolu adına yaxşı hadisədi. Ümid edək ki, hər şey gözlənildiyi kimi olacaq".

Anar Xanlarov (Rekord.az): "Müşahidə Şurasında yer alan şəxslərin "Neftçi"də baş məşqçi dəyişmək səlahiyyətinə sahib olduğunu düşünmürəm. "Neftçi"nin baş məşqçisi məsələsi başqa kabinetdə, və ya kabinetlərdə həll olunur, Müşahidə Şurasının qarşısına sadəcə, "bunu təsdiq edib, ictimaiyyətə açıqlayın" tələbi qoyulur. İkincisi, "Neftçi"nin problemi baş məşqçi deyil. Belə baxanda nəticəsinə görə Samir Abasov rəhmətlik Böyükağa Hacıyevdən sonra "Neftçu"də işləmiş ən uğurlu şəxs oldu. Ən əsası, "Qarabağ" kimi komamdanı qabaqlayaraq, "ağ qaralar"ın 7 illik çempionluq həsrətinə son qoydu. Son mövsümdəki gümüş medalı da faciə hesab etməzdim. Klub rəsmən açıqlayıb ki, Abasov kubokdakı nəticəyə görə istefaya göndərilib. Bu da gülməli səbəbdir. Neçə ildir "Qarabağ" kimi komanda da kubokda uğur qazana bilmirdi, indi onlar da Qurban Qurbanovu istefaya göndərsin? Yaxud "Liverpul" Kloppu istefaya göndərsin ki, keçən il uğurlu olduğun halda, bu il eyni nəticələri qazana bilmədin? Yenə deyirəm, bunlar cılız bəhanələrdi. Samir Abasovun yeganə problemi futbol diplomatiyasının olmamasıdır. Məsələn, heç bir məşqçi azarkeş haqqında o cür fikirlər səsləndirməli deyil. Fikir verin, Gəncədə az qala hər tur Yaşar Vahabzadəni istefaya səsləyirlər, haqqında ən sərt formada tənqidi fikirlər söyləyirlər. Amma adam hər açıqlamasında deyir ki, azarkeş nə deyir, haqlıdır, çünki yaxşı nəticə tələb etmək azarkeşin haqqıdır. Son olaraq deyim ki, "Neftçi" sözün əsl mənasında "Neftçi" olmaq istəyirsə, AFFA-nın müstəmləkəsindən qurtulmalı və müstəqil klub adını özünə qaytarmalıdır. Müşahidə Şurası filan, hamısı Elxan Məmmədovun Azərbaycan futbolunda qurduğu oyunlar idi, bu gün də davam etdirilir. Bunlar hamısı ləğv edilməlidir. Çingiz Abdullauyev VAR kimi epizoddan epizoda göründüyü halda, mövsümün sonunda gəlib klubun gələcəyi ilə bağlı qərar verə bilməz. Eləcə də bayramdan-bayrama şəkərbura misalı olan digər şəxslər. Hələ üstəlik hər biri ayda klubdan bəlli məbləğdə maaş alır. Dünyanın heç bir ölkəsində müşahidə şurasının üzvü klubdan maaş almır. Əksinə, kluba pul yatırıb səhm sahibi olur. Qısacası, bu idarəçiliklə "Neftçi"dən uğurlu gələcək gözləmirəm. Baş məşqçinin kim olmasının heç bir əhəmiyyəti olmayacaq. Güclənən "Sabah" və "Zirə"nin fonunda növbəti mövsüm "Neftçi"nin ilk "3-lüy"ə düşməsi belə çətin görünür". (sportinfo.az)