“Neftçi”in baş məşqçisi Samir Abasov Azərbaycan Premyer Liqasında 3-cü turu çərçivəsində “Turan-Tovuz”a qarşı keçirdikləri ev oyunu haqda danışıb.


Rekord.az xəbər verir ki, o, 0:1 hesablı məğlubiyyəti belə şərh edib:


“Epizodlar yaratdıq. Təəssüf ki, bəxtimiz də gətirmir. Əvvəlki matçlarda da belə idi. Digər matçlara baxanda, bu gün meydanda başqa "Neftçi" var idi. Çox ritmli və dinamik idi. İlk dəqiqədən bəlli idi ki, komandanın niyyəti nə idi. Qol buraxdıqdan sonra da təzyiqi davam etdirdik. Futbolçular çox istəyirdilər qol vuraq, udaq. İkinci hissədə qırmızı vərəqə ilə planlar pozuldu. 10 nəfər qaldıqdan sonra da müdafiəçilər soyuqqanlı və məharətlə oynadılar. Qapımızda epizod görmədən uduzduğumuz oyun oldu. Futbolçulara təşəkkür edirəm. İstəyə və dinamikaya görə. Səhvlər olacaq, tələskənlikdən irəli gələn səhvlər olacaq. Başa düşürük. Yaxşı işlər görməyə qadirik. Bu siqnalı futbolçulardan gördüm.


Rəqibə epizod vermirdik. Bu da üzərində durduğumuz məqam idi. Reallıqdır, qapıçının səhvi var. Amma bir səhvlə onu silmək, nəsə fikir bildirmək istəmirəm. Digər oyunçulara da. Kənanın yanındayıq. İnanıram ki, təcrübəsini, digər liqalardakı performansını bizdə də göstərəcək. İşimiz bu dəqiqə oyunçu cəzalandırmaq deyil.


Bu oyun bizim üçün siqnaldır və ümiddir. Bəhanə deyil. Birinci hissədə oynamış oyunçuların performansında əskiklik var. Bu komanda çox yaxşı işlər görəcək. Yetərincə çox yaxşı futbolçular var, bunu bacarcaqlar. Sadəcə, xal itirdikdən sonra nələr etdik, mənim üçün çətin olur demək. Komandama inanıram. 


Bu gün narazı qaldım referilərdən. Penalti epizodunu indi izah edə bilmirəm. Rəqibə ikinci sarı vərəqə vermək olar. Məncə, bir tərəfə daha çox simpatiya var idi. Bilmirəm, heç xoşuma gəlmədi. Bizim əsəblərimizlə oynadılar. Qırmızı vərəqə haqlı idi? Rəqib bizi təxribata çəkdi. Ribeyronun ixtiyarı yoxdur təxribata cavab verisn. Onu da baxıb, incələmək lazımdır. Əliyar orada gördüsə, qırmızı vərəqə qərarı verdisə, onun yanındayam, dəsətkləyirəm, inanıram. Mən digər məsələləri deyirəm. Biz özümüzü ev komandası kimi hiss etmədik. Dəhşətdir”.