Voleybol üzrə Avropa Liqasında (CEV Volleyball European League 2026) qadın və kişi  komandaların qrupları açıqlanıb. "Rekord.az" xəbər verir ki, Azərbaycanın yığma komandalarının da rəqibləri bəlli olub.
CEV-in reytinqində hazırda 27-ci pillədə qərarlaşan qadınlardan ibarət milli komandamızın rəqibləri İsveç, Estoniya, Şimali Makedoniya, İspaniya, İsrail və İsveçrə yığmaları olacaq. Reytinqdə 38-ci pillədə olan kişi milli komandamız isə Yunanıstan, İsveç, Rumıniya, İspaniya, Portuqaliya və Macarıstan yığmaları ilə qarşılaşacaq.
Qadınlardan ibarət millimiz birinci həftənin, kişilərdən ibarət komandamız isə üçüncü həftənin qarşılaşmalarını Bakıda keçirəcək. Oyunlar 2026-cı ilin iyununda baş tutacaq.
Qeyd edək ki, Avroliqanın formatında dəyişiklik edilib. 2018-ci ildən “Qızıl Avropa Liqası” və “Gümüş Avropa Liqası” formatında keçirilən yarış yenidən “Avropa Liqası” adlanacaq. Turnir Avropa çempionatına təsnifat xarakteri daşıyacaq və iştirakçılara reytinq xalları qazandıracaq. İştirakçı komandalar və oyunların proqramı CEV-in reytinqinə əsasən müəyyən olunur. Reqlamentə əsasən yarışda 24 qadın və 27 kişi komandası mübarizə aparacaq. Turnir cədvəli üzrə ilk 6 komanda (yarımfinal və final oyunlarının ev sahibi əvvəlcədən müəyyən olunacağı halda) və ya ilk 4 komanda növbəti mərhələyə vəsiqə qazanacaq. Yekunda 1-4 yerləri tutacaq komandalar 2028-ci ildə keçiriləcək Avropa çempionatına vəsiqə əldə edəcəklər.

Qadınlardan ibarət millimizin Avroliqadakı oyunları

1-ci həftə (Azərbaycan)
05-07.06.2026
   İsveç - Azərbaycan
   Azərbaycan - Estoniya
   Estoniya - İsveç

2-ci həftə (İspaniya)
12-14.06.2026
   Şimali Makedoniya - İspaniya
   Azərbaycan - Şimali Makedoniya
   İspaniya - Azərbaycan

3-cü həftə (İsrail)
19-21.06.2026
   Azərbaycan - İsrail
   İsveçrə - Azərbaycan
   İsrail - İsveçrə

Kişilərdən ibarət millimizin Avroliqadakı oyunları

1-ci həftə (İsveç)
05-07.06.2026
   Yunanısta - İsveç
   Azərbaycan - Yunanıstan
   İsveç - Azərbaycan

2-ci həftə (Rumıniya)
12-14.06.2026
   Azərbaycan - Rumıniya
   İspaniya - Azərbaycan
   Rumıniya - İspaniya

3-cü həftə (Azərbaycan)
19-21.06.2026
   Macarıstan - Azərbaycan
   Portuqaliya - Macarıstan
   Azərbaycan - Portuqaliya