Bakının ev sahibliyi etdiyi qadın voleybolçular arasında Avropa çempionatının (CEV Trendyol EuroVolley 2026 Women) C qrupunda altıncı günün oyunları keçirilib. "Rekord.az" xəbər verir, bugünkü qarşılaşmaları gənclər və idman naziri Fərid Qayıbov, Avropa Voleybol Federasiyasının prezidenti Roko Sikiriç, Azərbaycan Voleybol Federasiyasının prezidenti Şahin Bağırov, Belçika Voleybol Federasiyasının prezidenti Guy Juwet, İspaniya Voleybol Federasiyasının prezidenti Felipe Bernaldez Pascual Milli Gimnastika Arenasında canlı izləyiblər.

İlk olaraq İspaniya və Portuqaliya komandaları üz-üzə gəliblər. Bu görüşdə Portuqaliya rəqibini 3:1 hesabı ilə məğlub edib. 

Günün növbəti qarşılaşması Belçika və Azərbaycan komandaları arasında olub. Bu oyunda belçikalı voleybolçular 3:0 hesabı ilə qələbə qazanıblar.

Bugünkü oyunlardan sonra Belçika 11 xalla (4 oyun, 4 qələbə) C qrupuna liderlik edir. Niderland 8 xalla (3 oyun, 3 qələbə) ikinci, Azərbaycan 8 xalla (4 oyun, 3 qələbə, 1 məğlubiyyət) üçüncü, Portuqaliya 3 xalla (4 oyun, 1 qələbə, 3 məğlubiyyət) dördüncü, Rumıniya 2 xalla (3 oyun, 3 məğlubiyyət) beşinci, İspaniya 1 xalla (4 oyun, 4 məğlubiyyət) altıncı yerdədirlər.

Qeyd edək ki, növbəti oyunlar avqustun 27-də keçiriləcək. Sabah saat 15:30-da Niderland-Belçika, saat 18:30-da isə Portuqaliya-Rumıniya qarşılaşmaları baş tutacaq.

Avropa çempionatı 

26 avqust

C qrupu 

   İspaniya - Portuqaliya 1:3 (26:24, 23:25, 19:25, 20:25)

   Belçika - Azərbaycan 3:0 (25:19, 25:22, 25:23)