Qara Qarayev futbolçu karyerasını bitirdi. Buna təəssüfləndim. Təxminən 2 ay öncə ayaqüstü də olsa, xeyli söhbətləşmişdik, hiss edirdim ki, getmək istəyir. Yəni qışda da getməsə, yayda 100 faiz gedəcəkdi. Aramızda olan söhbəti təbii ki, bura yazmayacam, amma hiss edirdim ki, ona qarşı olan münasibətdən narazıdı. Mən də düşünürəm ki, karyerasının sonuna doğru ona qarşı haqsızlıqlar oldu. Xüsusilə "Qarabağ"da. Bu klubdan ayrılanda da bu haqda yazmışdım. Adam bütün ili əsas heyət oyunçusu olur, il qurtarır, komanda gedir istirahətə, yeni il başlayır, birdən-birə ehtiyata salınır, əvəzinə Romao oynadılmağa başlayır. O vaxtı da yazdım, razılaşmayanlar, əks fikir yazanlar oldu, hətta Romaonu qaldırıb qoydular dağın başına, amma zamanla kimin haqlı olduğu ortaya çıxdı. Buyurun baxın, Romao indi hardadı. Adamın 27 yaşı var, futbol yaşının pik həddindədir "Ferensvaroş"da çox vaxt heç sifariş ərizəsinə salmırlar. Salınanda da daha çox sonradan oyuna çıxır, 15-20 dəqiqəlik. Halbuki Qara 27 yaşında "Qarabağ"ın əsas heyətində beton töküb oturmuşdu, ÇL, AL əvəzedilmədən oynayırdı. Bir anda adamın üstündən xətt çəkdilər. Bu azmış kimi, "Qarabağ"dan gedəcəyi 99 faiz bilindiyi halda lazımsız avrokubok oyununda sona yaxın oyuna saldılar və məhz həmin lazımsız 3-5 dəq. görə "Neftçi"nin avrokubok matçlarında meydançaya çıxa bilmədi. Hə, bu arada onu "Neftçi"yə keçdiyinə görə az qala Vətən xaini çıxardanlar da oldu. Əzəli rəqibə keçib. Sanki bura Argentinadı, "Qarabağ" Boka Xuniors"du, "Neftçi" də "River Pleyt". O dar düşüncədən yanaşsaq, Müşviq Hüseynov da "xəyanətkar"dı ki, o da vaxtı ilə "Qarabağ"dan ayrılandan sonra gedib "Neftçi"də oynayıb...