AFFA-nın təşkilatçılığı ilə keçirilən U-10 Liqasına yekun vurulub.

Rekord.az xəbər verir ki, həlledici görüşdə "Neftçi"ni 3:2 hesabı ilə məğlub edən "Sabah" mövsümü çempion kimi başa vurub.

Matçda komandanın qollarına Yusif Ağayev (2) və Süleyman Qafarzadə imza atıblar.

Üçüncü yer uğrunda oyunda “Mübariz” və “Vətən” qarşılaşıb. Rəqibini 5:3 hesabı ilə məğlub edən “Mübariz” bürünc medalları qazanıb.

Final qarşılaşmasından sonra qalib komandaların mükafatlandırma mərasimi təşkil olunub. Əvvəlcə AFFA U-9 və AFFA U-10 Liqalarının “fair-play” mükafatları təqdim olunub.

Pərviz İsmayılov (“Neftçi”) U-9, Yusif Zeynalzadə (“Neftçi”) U-10 “fair-play” mükafatına layiq görülüblər.

Ardınca liqada ilk üç yeri tutan komandalara - “Mübariz” və “Neftçi”yə medallar və diplomlar, çempion “Sabah” komandasına isə kubok təqdim olunub.

Mükafatları AFFA-nın vitse-prezidenti Vaqif Sadıqov və futbol veteranı Rüstəm Rəhimov təqdim ediblər.