Futbol üzrə Belarus yığmasının yarımmüdafiəçisi Danila Neçayev UEFA Millətlər Liqasının qrup mərhələsinin 2-ci turunda Azərbaycan millisinə qarşı keçirdikləri oyunu şərh edib.

Rekord.az xəbər verir ki, o, qolsuz başa çatan matçdan sonra Belarus Futbol Federasiyasının rəsmi saytına açıqlamasında bunları söyləyib:

“İkili hisslər keçiririk. Oyunumuz o qədər də alınmadı. Hərçənd, özümüzdən tələb olunanı yerinə yetirməyə çalışırdıq. Qapımızı toxunulmaz saxlamağımız müsbət məqamdır. Mənfi məqam isə odur ki, qol vurmadıq və qalib gəlmədik. Rəqib bizi təəccübləndirmədi. Biz onları araşdırmışdıq, belə oyuna hazır idik. Ona görə də heç bir qeyri-adilik olmadı. Amma yaxşı rəqibdir və texnikalı futbolçuları var. Qalib gəlsəydik, öz oyunumdan razı olardım. Amma heç-heçə qənaətbəxş nəticədir”.

BATE-nin futbolçusu Azərbaycanla oyunun kobud alınmasını təbii hesab edib: “Yığmada oynamaq istəyirsənsə, var gücünü ortaya qoymalı, mübarizədən qorxmamalı, qalib ayrılmalısan. Ona görə də oyunun kobud alınmasında təəccüblü bir şey yoxdur".