Şimali Makedoniyanın paytaxtı Skopyedə güləş üzrə U20 Avropa çempionatı davam edir.

Rekord.az xəbər verir ki, altıncı yarış günündə sərbəst güləşdə ilk medalçılar müəyyənləşib.

Muhəmməd İsmayılov (57 kq) fransalı Qaspar Şenuya (11:0), Bəşir Verdiyev (65 kq) isə macarıstanlı Mozes Lasloya (12:1) tam üstünlüklə qalib gələrək bürünc medal qazanıb.

Hacı Kərimov (70 kq) finalda fransalı Bayssanqur Bitmurzayevlə qarşılaşıb. Rəqibinə heç bir şans tanımayan həmyerlimiz vaxtından əvvəl 10:0 hesablı qələbəylə Avropa çempionu olub.

Elcan Ismayılzadə (79 kq) təsəlliverici görüşlərdə ispaniyalı David Kodakovla (11:0) irlandiyalı Deklan Blaya (10:0) tam üstünlüklə qalib gəlib. Güləşçimiz ermənistanlı Narek Nikoqosyanla bürünc medal görüşündə hesabda 10:4 öndə olarkən “tuş”la məğlub olub.

Fərhad Süleymanlı (97 kq) finlandiyalı Yoona Yunnilaya 4:1 hesabıyla qalib gələrək bürünc medalı boynundan asıb.

Altıncı yarış günündə həm də 61, 74, 86, 92 və 125 kq-da yer alan sərbəst güləşçilər mübarizəyə qoşulub.

Camal Abbasov (61 kq) avstriyalı Kristian Tsikel (12:2), ermənistanlı Qaqik Qaqazaryan (10:0) və italiyalı Paskuale Liutsiyə (10:0) tam üstünlüklə qalib gələrək finala yüksəldi. Camal sabah finalda rusiyalı Usman İndirbayevlə güləşəcək.

Nurlan Ağazadə (74 kq) kosovolu Erand Fluqa (11:0), macarıstanlı Mate Varqa (10:0) və türkiyəli Umut Uslu (10:1) üzərində inamlı qələbə qazanaraq adını finala yazdırıb. Nurlan finalda almaniyalı Manuel Vaqinlə üz-üzə gələcək.

Məhəmməd Abbaszadə (86 kq) gürcüstanlı Daçi Papinaşvili (3:2) və türkiyəli Səfa Cəsuru (5:1) mübarizədən kənarlaşdırsa da, yarımfinalda ermənistanlı Razmik Yepremyana sonuncu xal prinsipinə əsasən (1:1) məğlub olub və sabah bürünc medal uğrunda güləşəcək.

Hüseyn Məmmədtağızadə (92 kq) moldovalı Aleksandru Borsla (4:1) almaniyalı Abdurrahim Sekmeni (3:0) üstələsə də, yarımfinalda rusiyalı Artur Toqoyevə (0:10) uduzub və sabah bürünc medal uğrunda güləşəcək.

Yusif Dursunov (125 kq) ukraynalı İvan Miroşniçenkoyla macarıstanlı Daniel Silağini 10:0, ermənistanlı Henrik Haykyanı isə 6:1 hesabıyla məğlub edərək finala vəsiqə qazanıb. Yusif həlledici görüşdə rusiyalı Soslan Qabuyevlə qarşılaşacaq.